సూర్య నమస్కారాల వల్ల కలిగే ప్రయోజనాలు
సూర్య నమస్కారాలలో మొత్తం 12 రకాల ఆసనాలు ఉంటాయి. వీటిని ఒక క్రమ పద్దతి లో ఎలా చేయాలి, వాటి వల్ల కలిగే ప్రయోజనాలు ఏమిటో ఇప్పుడు తెలుసుకుందాం.
1. ప్రణామాసన : సూర్యునికి ఎదురుగా నిటారుగా నిలబడి రెండు చేతులు జోడించి నమస్కారం చేయాలి.
➤ ఏకాగ్రత, మానసిక ప్రశాంతత పెరుగుతుంది.
2. హస్త ఉత్తానాసన : ప్రణామాసన భంగిమ నుండి ఊపిరి తీసుకుంటూ నెమ్మదిగా చేతులు పైకెత్తి వెనుకకు వంచాలి.
➤ ఊపిరితిత్తులను, ఉదర భాగాలను, వెన్నుపూసను బలపరుస్తుంది. చేతులు మరియు భుజాలకు రక్త ప్రసరణ మెరుగవుతుంది.
3. పాద హస్తాసన : హస్త ఉత్తానాసన నుండి ఊపిరి వదులుతూ ముందుకి వంగుతూ రెండు అరచేతులు మీ పాదాల పక్కనున్న నేలని తాకేలా ప్రయత్నించండి.
➤ ఈ ఆసనం వల్ల పొట్ట దగ్గర ఉన్న కొవ్వు కరుగుతుంది, జీర్ణక్రియ మెరుగవుతుంది. స్త్రీల రుతు సమస్యలు తగ్గుతాయి. మెదడు కి రక్త ప్రసరణ మెరుగవుతుంది.
4. అశ్వ సంచలనాసన : ముందుగా ఎడమ కాలుని వెనక్కి ఉంచి, కుడి కాలుని మడచి మీ గుండె కి దగ్గరగా తీసుకొచ్చి, ఊపిరి తీసుకుంటూ తలను పైకెత్తి చూడాలి.
➤ వెన్నెముకకు మంచి బలాన్ని ఇస్తుంది. కాళ్ళు మరియు తొడల కండరాలను బలపరుస్తుంది.
5. దండాసన : మీ శరీరాన్ని నేలకి సమాంతరంగా ఉండేలా కాళ్ళు, చేతులు నేలమీద ఉంచి నడుమును పైకి ఎత్తకుండా శరీర బరువు మొత్తం కాళ్ళు మరియు చేతులతో మోసే విధంగా ఊపిరి తీసుకుంటూ చేయాలి.
➤ ఈ ఆసనం ఛాతీ, వెన్నెముకకు బలం చేకూరుస్తుంది. భుజాలనీ, ఛాతీనీ స్ట్రెచ్ వల్ల శరీరానికి మంచి సౌష్టవం వస్తుంది. వెన్నునొప్పి నుండి ఉపశమనం లభిస్తుంది.
6. అష్టాంగ నమస్కారాసన : తల, కళ్ళు, చెవులు, నోరు, హృదయం, చేతులు, పాదాలు, తొడలు - వీటిని అష్టాంగాలు అని పిలుస్తారు. ఊపిరి వదులుతూ మీ పిరుదులని పైకి ఎత్తి, మీ గడ్డం, చేతులు, ఛాతీ, మోకాళ్ళు నేలని తాకేట్టుగా ఉండాలి.
➤ కాళ్ళు, చేతులు మరియు మెడ కండరాలను బలపరుస్తుంది.
7. భుజంగాసన : బోర్లా పడుకొని ఊపిరి తీసుకుంటూ చేతుల సహాయంతో నడుముకు పై భాగం మొత్తాన్ని వెనుకకు పాము పడగ విప్పినట్టుగా వంచాలి.
➤ ఈ ఆసనం నడుము నొప్పిని తగ్గిస్తుంది. జీర్ణకోస వ్యాధులు తగ్గించి, మలబద్దకం, గ్యాస్ట్రిక్ వంటి సమస్యలను నివారిస్తుంది.
8. పర్వతాసన : ఊపిరి వదులుతూ రెండు కాళ్ళు, రెండు చేతులు దూరంగా నేలకు ఆనించి నడుమును పైకి లేపి పర్వతాకారంలో ఉండాలి.
➤ కాళ్ళు మరియు చేతుల కండరాలకు మంచి బలాన్నిస్తాయి. రక్త ప్రసరణను మెరుగుపరచి వేరికోస్ వెయిన్స్ నుండి ఉపశమనం లభిస్తుంది. వెన్నెముకకు కూడా బలపరుస్తుంది.
9. అశ్వ సంచలనాసన : పైన తెలిపిన 4వ ఆసనాన్ని మరల చేయండి.
10. పాదహస్తాసన : పైన తెలిపిన 3వ ఆసనాన్ని మరల చేయండి.
11. హస్త ఉత్తాసన : పైన తెలిపిన 2వ ఆసనాన్ని మరల చేయండి.
12. ప్రణామాసన : పైన తెలిపిన 1వ ఆసనాన్ని మరల చేయండి.
సూచనలు : సూర్య నమస్కారాలు చేసేటప్పుడు పాటించాల్సిన కొన్ని సూచనలు ఇప్పుడు తెలుసుకుందాం.
# సూర్య నమస్కారాలు సాధన చేయడానికి అనువైన సమయం సూర్యోదయ సమయం. సూర్యునికి అభిముఖంగా, నెమ్మదిగా చేయడం ఇంకా మంచిది. సూర్యాస్తమయం సమయంలో కూడా సాధన చేయవచ్చు.
# శ్వాసక్రియను ఆసనాలకు అనుగుణంగా జోడించడం వల్ల మరింత ప్రయోజనం ఉంటుంది.
# క్రమం తప్పకుండా ఆచరించాలి.
# మొదట్లో నియమితంగా చేస్తూ, యోగా నిపుణుల సలహాతో సాధనను పెంచవచ్చు.
# చివరగా శవాసనంతో శరీరానికి విశ్రాంతినిచ్చి విరమించాలి.
జాగ్రత్తలు : సూర్య నమస్కారాలు చేసేటప్పుడు పాటించాల్సిన కొన్ని జాగ్రత్తలు ఇప్పుడు తెలుసుకుందాం.
# వెన్నునొప్పి, డిస్క్ సమస్యలు, తీవ్ర ఆరోగ్య సమస్యలు ఉన్నవారు వీటిని సాధన చేసే ముందు వైద్యుడిని మరియు యోగా నిపుణులను సంప్రదించాలి.
# హెర్నియా, సయాటికా ఉన్నవారు చేయరాదు.
# స్త్రీలు నెలసరి సమయంలో చేయరాదు.